skip to Main Content
Menu
ሕድሪ’ዩ ሕድሪ መብጽዓ

ሕድሪ’ዩ ሕድሪ መብጽዓ

        ሕድሪ’ዩ ሕድሪ መብጽዓ

        ክፍሊ ዜናን ሓበሬታን ሰዲህኤ

 

          ሕድሪ’ዩ ሕድሪ መብጽዓ

          መዋጽኦ ጸልማት ጥዋፍ ስምዓ

          ክብሪ ህዝቢ ስልማት ሃገር መልክዓ

          ኣይስፈርን ብምዕሮን እንቅዓ፡

 

ወዲ ኣባ ጥመር ደግያት ሓጎስ

ወዲ ጅግና ኣባ ጎፋር ደግያት ክፍልየሱስ

ወዲ ጅግና ደግያት ሓድገምበስ

ወዲ በጎስ ወዲ ገብረክርስቶስ

 

           ወዲ እብራሂም ሱልጣን ዓሊ

           ወዲ ኣኪቶ ዓሰብ ደንከሊ

           ወዲ ዓዋተ ዓብደልከሪም ጥዑም ፋሊ

           ንያትካ ስምካ ላዕሊ ላዕሊ፡

 

ሓው ፋጥማ ዑስማን

ሓው ኣለም መስፍን

ርእስኻ ምስ ኣልዓልካ ዘይትደንን

ኣርሓ ሃገር፡ ሽደን

ሎሚ ከይመስሎም ከም ቀደም

ዕጹድ ግራት ዝቅርም

ኣድራጋ ትዓጽድ፡ ባሕሪ ትኸርም፡

 

            ፈላልዩ ጸላኢ ኣብ መንጎኻ እንተሃለ

            ስዋ ብዋንጫ ሜስ ብርለ

            ቀሪቡ ማሰ እንተበለ

            ኣይትገራህ ኣይትደህለለ

            ጉዳይካ ኣቀድም እዚ’ዩ በሎም እንሀለ፡

 

ውራይካ ከይዝረግ

ወዲ ማይ ሞጕዶም ማይ ጓይላ ፈለግ

በዓል ሽም፡ በዓል ግርማ መዓርግ

ኣይትወሳወስ ኣይትበል ነግ ፈረግ

በለሳኻ፡መረብኻ፡ ዓንሰባኻ፡ ጋሽኻ’ኳ መንገዲ ዝጸርግ፡

 

             እንታይ ኣሎካ ዘሕስብ ዘደናግር

             ተውሓስ እንተበሉኻ ስውእ ዝምስክር

             አግብእ ተበሉ ምርሓዮም መቓብር

             ዝተረፈ መላኣዮ ታሪኽ ተርትር

             እንተሰምዕዎ ቀለም ዘንጽፍ፡ ዘይውዳእ ምስጢር፡

 

ምስጢር ቃልሲ

ንሰላም ፍትሒ ዲሞክራሲ

ንልምዓት ራህዋ ራሕሲ

ንፍቕሪ ሰናይ ጉርብትና ፈልሲ፡

 

             ከም መጥሓን መዲድ ዝተወቕረ

             ዝተብዐ ሓጺን ዓረ

             ካብ ወርቒ ብሻ ንላዕሊ ትሕረ

             ኣብ ክብሪ ታሪኻ ተመለስ እምበረ

             ጸገም የልቦን ኩሉ ክዕረ            

             ኣይግድኻ ኣይትሸበር ወዲኤረ፡

 

መሬትካ ለምለም መሬትካ ልሙዕ

ከበሳ ዕፉን ስግመ፡ መታሕት ብልቱግ ትበልዕ

ህዝብኻ ለዋህ ጽን’ሉ ዝሰምዕ

ወዲ ቀይሕ ባሕሪ ዕርድኻ ጽኑዕ

ምኽሪ ጸላኢ ግደፍ ህዝብኻ ከይግፍዕ፡

 

              በዓል ታሪኽ በዓል ዝና

              በዓል ዜማ በዓል ቃና

              በዓል ማህደር ሰነድ በዓል ብራና

              ክብርኻ ልበስ ከይኽዕበካ ጓና፡

 

ሃገር ኤርትራ ንደላይ ጽቡቕ ተቅንእ

ህዝብና ልቡ ቅሳነት ክመልእ

ህያብ ስውኣት ጸግኡ ዘይውዳእ

ተለዓል ውዲ ሃገር ንያትካ ኣይትሕባእ፡

 

             ኤርትራ ሃገረይ ዓለመይ

             መሬት ዓደቦይ ቀዳመይ

             ሕጂ ደኣ’ሞ ናበይ

             ኢልካ ተለዓል ተነበይ፡

 

እወ ቅለቶም ንሓው፡ሓውቲ፡ኣደ፡ኣቦ

ኣውያቶም ስማዕ ኣንብቦ

ሓድነትካ ይትረር ፋይዳ ክርከቦ

ጉዳይካ’ዩ ዕሰሎ ክበቦ፡

 

ሰዲህኤ

6 ነሓሰ 2018

 

 

 

            

 

 

 

              

 

 

 

 

 

 

 

 

            

              

 

 

             

 

 

 

 

 

 

 

          

          

Leave a Reply

Your email address will not be published. Required fields are marked *

Back To Top