skip to Main Content
Menu
ሻነት

ሻነት

                        ሻነት

                እብ  ሽፋ  መ/ኑር

 

ከቦታያ  ቀጢን  ሻነት  እንቲ

ስጋድ  ዓርኮከባይ ሓሊብ  ሳቲ

ኣስክ  ድገ  ዓድና ምዶል  ተኣቲ

ምስልኪ  ብና  ሕና   ፍቲ

 

 

           ኣጭፋር  ኣሽከለላ  ግሩም  እገር

          ዕንታት  ለኣትራዋርሕ  ጃህራይ  ዓስተር

          ኢኣመርና  ስራይ  ሚክም ልትበሰር

          ኣባይና  ኣባይኪ  በንበን ልንበር

 

 

ጋምል  ሸሊላ  ዝብደት  እትራኣሳ

ክርን ውቅል  ዕላላ  እትህዳይ  ደለሳ

እከለትኪ  ለጥዕም  ሕቛን  እብ ሔሳሳ

ብልቱግ  ዎማሸላ  ነብራ ምና  ሓርሳ

ሸንሃት  እቡ  ለልብና   ዲም ምስላ ገሳ

ኢረከብና  እትሞዳይ ሰማ   ምንና  ሐሳ

 

 

ግል  ኩሉ  ልትሃየብ  እትሃወቱ  እሱር

ርከቦ  ለልብል  እደይኪ  ለዕሹር

ሰፋለለዩ  ገሮብና  ግል ሓሊብኪ  ውጩር

ግል  ሕያይ  ሒለት  ዎደዋ  ግልሑኩር

ዓሸም  ብና  ዲቡ  ጢሾኪ  ለእሙር

 

 

        ቀደም  ብሎ  ውላድ  ኣብሽርኩም  ኣርሕቦ

        ላእሉ  ብና  ኩሉ  ሰኒ  ትትሃየቦ

        ኣባይኩም  ውላጀ  ምራድኩም  ርከቦ

       ለበልኪና  እንቲቱ በዓላ  ቀጣን  ከቦ

        ኤርትርያ  ዓዳ  ሽፍር  ንዋይ  ዎ  ክቦ

 

 

እንቲ  ትብሊ  ውላጀ  ዎሕናእ  እምብል ይማ

ሕሽምት  ምን  ረቢሃ  ኦሮ  ኢነቅማ

ዲብ  ኩሉ  እሙርቱ  ሻነት ፍቱይ ስማ

ኢልትረሳዕ  ውዳይኪ ኢበደ  ግልዲማ

እግልሚ  ክምእና ግልሚ ዘመን  ረማ

ረቢ  ምንልብሉ ምስል  እንሳግማ

 

 

          እብ  ንእሻ  ሕት  ዎክም  ዓበት  እም  ኣማን

          ዎሽራሓ  ታሪኽኪ  ምን  ለሃለ  በርላማን

          ከምቶም  ለሻሃዳ  ምን  ውላድኪ  ለሰማን

          ስርበብ በዝሓ  ዲብና  ሰፍለልናኪ ገረማን

 

 

በርቅ  ናይ ኤተቢት ዝላም  እብ   ህዱዳ

እብ  ንዋያ ኣዳማ  ዓድና  ምስል  ሕዱዳ

ዲማ  ዲብ  ልብናታ  ሻነት  ሰኒ  ምራዳ

 ላሊ  ስካብ  ከሌና  ሃጋይንኪ  ክቡዳ

 

 

     ኢጸበርና  ክልዶል  ግልኪ እንደ ንሓለ

     ክኒ  ዎኢጋባእኪ   ሑኪ ምን ለሃለ

     ሽሂድ  ዎሽሂዳ  ኣባይ  እቦም  ልትመለ

     ራእስኪ  ዎረፍዓው  ዮማ  ክምሰል  ማለ

     ኣባይና  ዎኣባይኪ  ሻነት ምን ሕድ ልትዋለ

 

 

ኢናእስትህላ  ሻነት  ግልሚ  ጋእና ክምእና

ሓቆ  ኩሉ  ዓውል  ምስል  ለእግሉ ደፋዓና

ምና  ናይና  እሙር  ሽፍር  ኣብዕብና

ዲቡ  ሃላ  ኣሰር  ደርሕ  እምና  ኣቡና

ግናቅብሉቱ   ሻነት ሞላይ  ምን  ሰልመ

 

Leave a Reply

Your email address will not be published. Required fields are marked *

Back To Top