skip to Main Content
Menu
ኩሉ  ኩሉ ኢንሃድጉ  ኖሱ  ስመቱ  ክሪት!!! ስመቱ  ክሪት!!!…….ስመቱ  ክሪት!!! ለጣ እንብሉ

ኩሉ ኩሉ ኢንሃድጉ ኖሱ ስመቱ ክሪት!!! ስመቱ ክሪት!!!…….ስመቱ ክሪት!!! ለጣ እንብሉ

 ኩሉ  ኩሉ ኢንሃድጉ  ኖሱ  ስመቱ  ክሪት!!! ስመቱ  ክሪት!!!…….ስመቱ  ክሪት!!! ለጣ እንብሉ። 

                   
                         ድግም
       ሓይሳም  ዎሓይሳት  ቀርአት  ወብሳይታት  ኮፎ  ሃለኩም  እኩባም  ወስሉማም? ሞላይ  ክማፈታ  ወደ ሕና  እምበል  ሰፈላልኩም(………)  ሃለና እንደእምበ  ምን  ንሓልፍ  ልሓይስ። 
        ሓይሳም  ዎሓይሳት ኣና  ፋጥና  ወለት  ሳልሕ  ወድ  ክጅር  ወድ  ዕተል  ልብሉኒ  ለምለም  ወለት  ገብረስ  ወድ  ዓምደስ  ልቡላ  መስንየቸታ  ክልዶል  ግልትሰኣል  ዎተኣምር  ፈተ  ዮም  ሓተ  ወድ  ዘማየ  እግሉ  ገብሻ  ዎ  ገብሻ   ገብሻ………ገብሻ  እንደእበ  እትላከዩ  ዓልኮ   ሰምዓተኒ ካ  ክምእኒ  ትበሃህልና።  
       ለምለም:— እንቲ  ፋጥና  እሊ  ጅና  ለእሉ  ትትላከዪ  ሃለኪ  ዓሊ  ኢኮን  ስመቱ   ዓሊ  ዓሊ  ኢትብሉ  ግልሚ  ገብሻ  ገብሻ  ትቢሉ  ሃለኪ  በለተኒ።
    ፋጥና:— ስርዕናቱ  ሕና  ጅና  ዲብ  ስሜት ሓሙና  ዘማና (ኣታላኩምና)  ድቡ  ዶል  ልሰመ  እንሰርዑ  እባ  ስሜቱ  ኢንትላከዩኒ  ስርዕ  ብና  እበላ።
ለምለም:–ስርዕ  ዲብ  ኩሉ  ሃላ  ሕናማ  ስርዕ  ብና ግላ  በዓላ  ቤትና  ኣው  እናስ  ዓቢ  እግሉ  ኣብ  ገብራይ  ኣብ  ወልዳይ  ኣብ  ዓንዳይ  ዎግል ሓሙና  ሃየ  ይባ  (ኣቦ)  እንብሉ   ስርዕ  ናይኩም  ላኪን  በዝሓ  ተዓብ  ገብኣ።
ፋጥና:—  ሓተ  ተዓብ  ኣለቡ  ዓዳትናቱ  ኩሉ  ስሜትካ  ስርዕ  ናያ  ብና  እግላ።
   ለምለም:—  ዓጀብ  ዎዓጃይብቱ!!!!ኩሉ  ለኣስማይኩም  ኦሮካ  ስርዕ  ናዩ  ሃላ  እግሉ  ትብሊ  ሃለኪ?
ፋጥና:—ኣይዋ  ኣዪ  ስመትካ  ስርዕ ናያ ሃላ  እግላ።  እሊ  ለጣ  ኢኮን  ደብር  ድገ  ዓድ   ኣው  መዲነት  ኣካን  ማ  እታ  ኣስማይ  ናይ ሰብና  ዎውላድና  ስሙይ  ሚንገብእ  እንሰርዑ።
ለምለም:—እግል  ኢብራሂም   ምትቡሉ?
ፋጥና:—  ኸሊል   እምብሉ።
ለምለም:—ግል  ሓምድ  ሃየ  ምትቡሉ?
ፋይና:—-ዓንጃ    እምብሉ።
ለምለም:— እግል  ዓሊ   ሃየ  ሚ  ትቡሉ?
ፋጥና:—ገብሻ  እምብሉ።
ለምለም:—-ኣካን  ዓድማ  እንሰርዑ  ተልኪኒ  እዘ  ግል  ሰኣለኪ  ግላ  መዲነት  (ዓሊ  ግድር)  ሚትቡላ?
ፋጥና:—-  (ገብሻ  ግድር)  እንብላ?
ለምለም:—-  እንደ  ትትሃገው  እንደትትሃጀኮ ( ዓሊ  ከፍካ  ኢኮን)  ግልቲበሎ  ምንተሓዙ  ምትብሎ?
ፋጥና:—-(ገብሻ  ከፍካ)  ኢኮን  እንብል።
ለምለም:—ስመት  ስርዕ  ኣለቡ  ብኩም?
ፋጥና:—ኣለብናኒ  ኩሉ  ኣስማይና ልብዛሕ  ዎልውሓድ   ስርዕ  ብና  እግሉ  መዓግብ : ኣብረዳ:  ሓሊባይ : ሮማይ : ድሩይ : ኣዳላ  :ግንደይ  ወድ ዕላማ…….እምብል  ስሜትካ  ናይ  ብና  እግላ።
ለምለም:—እሊ  ዓዳትኩም  ዓጃይብቱ  ፋጥና  እሎም  ሰብ  ኣው  ውላድ  ናይኩም  ሃይ  እግላ  ኣንስ  ኣው  ኣዋልድ  እግለን  ሰርዖ  ወላ  እንቱም  ኣንስ  ዏኣዋልድ  ለጣ  እንቱም  ለሰርዖ።
ፋጥና:— ሰብና  ወውላድና  ብዙሕ  ኢሰርዖ  በስ  ዲብ  ሓለት  ሓተ  ዲባ  ሰረዖ።  እናስ እሲት ኣው  ሕጣን ግል  ወለት  ፈተያ  ምን  ገብእ  ላኪን  ስመታ ስርዕ  ስርዕ  ናይ  ፍቲ  ልቡሉ  ሃላ  ካ  እቡ  ሰምያ።  ዎ  እብ  ሕላይ  ሰረዓ  ዎሰምያ።
ለምለም:— እባ  ስርዕ  ሕላይ  ግል  ወለት  ኣው  እሲት  ሚ ልቡላ  እንደ  ገለ  ኣስእሊ  ምኑ?
ፋጥና:—ስራይ:  ኣፍ-ሓሊብ :ነከሾት : ዳውሪት  ገረማን : ክብት : ሻነት:  ሻኖተት:  ክቡዳ:  ልቡላ። 
ለምለም:—እሎም  ሰብኩም  ዎውላድኩም እግል  እሲት  ኣው  ወለት  እብ  ሕላይ  ሃየ  ሚ  እንደበሎው  ሰሩዓ  ለሓልዋ?
ፋጥና:— ኣንድሮበል  ለሱግ  ሸገዩ
              ለሰባቱ  እራይ  ደነዩ
              ሻምኪ  ስራይ  ለኣልባብ  ነስኣዩ
              ለትሓጀካ  መረር  ጸብጠዩ
              ለፍቲኪ  ኣፍ-ሓሊብ ኮፎ  ኢደዩ
እንደበለው  እንደለሓሉ ሳምዓት  ኢኢንቲ  ለምለም ግልሚ  ጋና  ገብኢ  ሃለኪ?
ለምለም:—ያረይ  ዘከርኪኒ  ፋጥና  ሕቸ  ሰኒ  ሳምዓት  ኣና  እበለኪ  ፋጥና  ሕቸ  እግል  ሹም  ናይኩም  ስመት  ስርዕ  ብኩም  እግሉ?  ዋላ  ኮፎ  ቱ?
ፋጥና:— ሹም  ናይና  እብ  ፍትሕ  ዎዓዳለት ሰኒ  ሓክም  ገብኣ  ምንገብእ  ኢንሰርዑ  ኩሉ  ኩሉ  ኢንሰርዑ  ሹም  ሹም  ሰኒ  ሹም  ናይና  ለጣ  እንብሉ ምን  ሹም ትጥዕም  ስሜት ኣለቡኒ  እብ  ፍትሕ  ዎዓዳለት  ሓክም  ሓቆ  ኢገብኣ  ሃየ  ስርዕ  ብና  እግሉ  ሰኒ እንሰርዑ።
ለምለም:—እብ  ፍትሕ  ዎዓዳለት  ሓክም  ሓቆ  ኢገብኣ  ሃየ  ሚ  ትቡሉ  እንደ  ኣስእሉኒ?
ፋጥና:—- ቁልወላሓት  ትግባእ  ዲቡ!!!!!! እብ  ፍትሕ  ዎዓዳለት  እንደ  ኢሓክም  ቀትል  ዏኣስር  ዎለኣበደ  ግልኖሶ  ለጣ  በልዕ  ዎሰተ  ሕቆ  ገብኣ  ኩሉ  ኩሉ   ኢንህስድጉ  ኖሱ  ስመቱ  ክሪት!!!!ስመቱ  ክሪት!!!!!  ስመቱ  ክሪት!!!……..ስመቱ  ክሪት  ለጣ  እብምሉ።

Leave a Reply

Your email address will not be published. Required fields are marked *

Back To Top